Sider frå Sogn blir geografisk beskytta - historisk markering i Berlin

Denne veka er Sogn representert i Berlin i samband med Internationale Grüne Woche, ei av verdas største landbruks og matmesser. Torsdag 15. januar blir det markert at Sider frå Sogn er tildelt status som beskytta geografisk nemning, ei utmerking som stadfestar den sterke koplinga mellom siderproduksjonen, landskapet og tradisjonane i regionen. Med beskytta geografisk nemning blir Sider frå Sogn plassert i same kategori som kjende europeiske vinregionar, der opphav, kvalitet og tradisjon er juridisk verna.

Sider frå Sogn - geografisk beskytta nemning

Bakerst frå venstre: Geir Arve Sandvik - varaordførar i Luster kommune, Nina Hegdahl – fagsjef Beskytta nemningar i Stiftelsen Norsk Mat, Bernt Bucher-Johannessen - dagleg leder i HANEN, Dirk Kohlman frå Statsforvaltaren i Vestland, Endre Kleiveland, styreleiar i Sogn Frukt- og siderlaug, Stig Ove Ølmheim, ordførar i Sogndal kommune, Line Bjelde, dagleg leder i Sogn Næring, Eli-Grete Høyvik - Balholm og styreleiar i Hanen, Anne Mette Johnsen – adm.dir i Stiftelsen Norsk Mat, Åge Eitungjerde - Balholm, Bendichte Stedje - salssjef i Visit Sognefjord, Mette Marie Heiberg - Amble Gård.

Foto: Stiftelsen norsk mat

Markeringa skjer på Den nordiske ambassaden i Berlin, med landbruks og matministeren som vertskap. Delegasjonen frå Sogn består av siderprodusentar, politisk leiing, reiseliv og næringsapparat, og samlar aktørar som har vore sentrale i arbeidet med å løfte sidere fram nasjonalt og internasjonalt.

Beskytta geografisk nemning gir eit formelt vern av namnet Sider frå Sogn og stiller krav til både råvarer, produksjon og opphav. Samstundes opnar ordninga for nye moglegheiter innan verdiskaping, reiseliv, eksport og profilering av Sogn som mat og drikkeregion.

I samband med markeringa blir det også gjennomført faglege samtalar om kva denne statusen betyr vidare, både for produsentane, for reiselivet og for regionbygging i Sogn. Delegasjonen deltek òg på den norske paviljongen under Grüne Woche, der Norge blir marknadsført saman med sterke matregionar frå heile Europa.

Sognedelegasjonen på veg mot Berlin

Frå venstre: Anne Mette Johnsen adm.dir stiftelsen norsk mat, Line Bjelde frå Sogn Næring, Åge Eithungjerde frå Balholm/ciderhuset og Endre Kleiveland frå Sogn frukt og siderlaug og Ølmheim siderhage

Som del av vidare satsing er den nye nettsida for Sider frå Sogn lansert. Nettsida samlar kunnskap, produsentar og forteljingar frå heile regionen.